Borgin leitar til CEB

Reykjavíkurborg íhugar nú að sækja um og hefja viðræður við Þróunarbanka Evrópuráðsins, CEB, um lánsfjármögnun. Málið verður rætt á fundi borgarráðs á morgun. Einnig verður borin fram tillaga um útgáfu á nýjum skuldabréfaflokkum.

Eins og áður hefur verið fjallað um hefur borgin fullnýtt þær lánalínur sem hún hafði hjá íslensku bönkunum, um 12 ma.kr. Þá hefur þátttaka í skuldabréfaútboðum borgarinnar gengið upp og ofan, en borgin sótti 21 ma.kr. í lánsfjármögnun á síðasta ári þar sem kröfurnar fóru hækkandi. Í fjárhagsáætlun Reykjavíkurborgar er áætlað að borgin taki lán fyrir allt að 16,5 ma.kr. í ár. Í fyrra var Reykjavíkurborg eitt þeirra sveitarfélaga sem eftirlitsnefnd með fjármálum sveitarfélaga (EFS) sagði ekki uppfylla öll lágmarksviðmið fyrir A-hluta rekstrar.