Bankaráð svarar „aðdróttunum“ Bankasýslunnar
Setja bókamerki
„Ýjað hefur verið að því að sú leið sem var valin við fjármögnun bankans á kaupum á TM hafi verið valin til að komast hjá því að leita samþykkis hluthafafundar. Það er fjarri sanni og í því felast aðdróttanir í garð bankaráðs.“
Á þessum orðum hefst yfirlýsing sem bankaráð Landsbankans hefur gefið út, þar sem vísað er til „ítrekaðra ummæla frá Bankasýslu ríkisins um störf og ákvarðanir bankaráðs Landsbankans“.
Tryggvi Pálsson, formaður Bankasýslu ríkisins, segir í Dagmálum Morgunblaðsins í dag að þessi fjármögnunarleið bankans sé með „ólíkindum“.
Leiðin talin hagstæðust
Tekið er fram í tilkynningu bankaráðs að Landsbankinn greiði fyrir tryggingafélagið með handbæru fé og sem mótvægisaðgerð hyggist bankinn gefa út víkjandi skuldabréf.
„Sú leið var valin vegna þess að hún er til þess fallin að viðhalda getu bankans til að greiða reglulegar arðgreiðslur til framtíðar, í samræmi við markmið eigandastefnu ríkisins.
Þessi leið var talin hagstæðust fyrir bankann og eigendur hans. Ekki var þörf á útgáfu nýs hlutafjár, enda verða eiginfjárhlutföll bankans vel yfir lögbundnum mörkum og markmiðum bankans.“
Minna á skuldabréfaútgáfu
Þá segir að hefði Landsbankinn ætlað sér að greiða fyrir TM með útgáfu nýs hlutafjár, hefði þurft samþykki hluthafafundar.
„Íslandsbanki staðfesti á aðalfundi sínum að tilboð bankans í TM gerði ráð fyrir hlutafjáraukningu. Í fundargerð aðalfundar Íslandsbanka kemur fram að „tilboð bankans í TM tryggingar hf. hafi verið gert með þeim fyrirvara að hluthafafundur Íslandsbanka samþykki útgáfu nýs hlutafjár til greiðslu kaupverðs“.
Landsbankinn taldi hagstæðast að greiða með handbæru fé og gefa í kjölfarið út víkjandi skuldabréf að fjárhæð 13,5 milljarðar króna sem greiðist upp eftir fimm ár, en ekki með því að auka hlutafé. Þá má minna á að í mars 2024 gáfum við út víkjandi skuldabréf að fjárhæð 15 milljarða króna sem eykur umfram eiginfjárgrunn um sömu fjárhæð.“
Þá segir, að eins og rakið sé í greinargerð bankaráðs Landsbankans til Bankasýslu ríkisins frá 22. mars sé eiginfjárbinding Landsbankans vegna kaupanna á TM um 18,7 milljarðar króna.
„Eiginfjárstaða bankans fyrir kaupin er 23,6%. Áhrif kaupanna eru lækkun um 1,5 prósentustig og eftir kaupin yrði eiginfjárhlutfallið 22,1%. Mótvægisaðgerðir hækka hlutfallið aftur í 23,1%. Eiginfjárkrafa á bankann er 20,7%. Viðmið bankans er að vera ávallt yfir lágmarkskröfu. Staðan er því sú að eftir kaup TM og með eða án mótvægisaðgerða yrði bankinn alltaf vel yfir eiginfjárkröfum,“ segir í tilkynningu.
Kaupin góð fyrir bankann
Einnig er bent á að í fyrrnefndri greinargerð bankaráðs frá 22. mars þá hafi bankaráð átt, frá miðju ári 2023, frumkvæði að því að upplýsa Bankasýsluna um áhuga bankans á að kaupa TM.
„Þann 20. desember 2023, sama dag og bankinn gerði óskuldbindandi tilboð í félagið, var Bankasýslan upplýst í símtali um að bankinn væri þátttakandi í söluferli TM. Bankasýslan setti aldrei fram athugasemdir eða óskaði eftir frekari upplýsingum eða gögnum fyrr en eftir að tilboð bankans hafði verið samþykkt.
Bankaráð ítrekar að það uppfyllti upplýsingaskyldu sína gagnvart Bankasýslunni og að kaupin á TM eru í samræmi við eigandastefnu ríkisins. Kaupin voru ítarlega undirbúin, þau eru góð fyrir bankann og í þeim felast mörg tækifæri.“
Offramboð á leiðindum í nokkur ár
Hjólandi fjölgar hægt en örugglega
Landrisið gæti hafa stöðvast og gosið virðist eflast
„Mjög ánægður með útkomuna“
Fullyrðir að kindurnar beri ekki eftirlitslausar
„Eigum eftir að sjá miklar sviptingar“
Atvinnuhúsnæði ekki keypt upp í Grindavík
Verið að búa til „óánægju og kergju“