Krefjast tugprósenta hækkana

Hætt er við verkfalli tæplega 20 flugmanna norska flugfélagsins Norwegian þar sem enn hefur ekki samist með norsku vinnuveitendasamtökunum NHO Luftfart og flugmannastéttarfélaginu Parat.

Fyrr í vikunni tókst þó að afstýra fjölmennu verkfalli starfsfólks flugvallanna Gardermoen við Ósló og Flesland í Bergen með samningum Fellesforbundet við NHO Luftfart en talsmenn hins síðarnefnda lýsa kröfum flugmanna sem algjörlega út úr kortinu. Krefjast þeir launahækkunar á bilinu 25 til 38 prósent á meðan þeir samningar sem nú hafa náðst innan fluggeirans fela í sér meðalhækkun upp á 5,2 prósent – sem telst mikil hækkun miðað við norska kjarasamninga.

Frétt af mbl.is

Verkföll vofa yfir stærstu flugvöllum

Norskir flugstjórar þéna að meðaltali 1,4 milljónir króna á ári, jafnvirði um 18,3 milljóna íslenskra króna, en Norwegian-flugstjórar vilja nú 1,9 milljónir í grunnlaun á ári, það er 24,8 milljónir íslenkra króna. Deilan er á borði ríkissáttasemjara.

Flugmenn setið eftir í 15 ár

„Við verðum því miður að segja að mikið ber í milli,“ segir Erik Lahnstein, forseti NHO Luftfart, við norska ríkisútvarpið NRK, „að þeir fari fram á margfalda hækkun miðað við launaramma geirans er krefjandi. Það er von okkar að samkomulag náist um eitthvað sem er í líkingu við það sem tíðkast á norskum vinnumarkaði,“ bætir hann við.

Forsetinn bendir enn fremur á að fluggeirinn eigi að baki mjög erfitt tímabil sem ekki síst hafi komið illa niður á Norwegian sem fékk hundrað milljarða króna skuldir afskrifaðar, jafnvirði rúmlega 1.300 milljarða íslenskra króna. Bendir hann enn fremur á að skandinavíska flugfélagið SAS standi nú í enn einni fjárhagslegri endurskipulagningunni, nýja flugfélagið Flyr hafi orðið gjaldþrota og Widerøe hafi ekki komist upp fyrir núllið í fjögur ár.

Formaður stéttarfélags flugmanna Norwegian segir vegalengdir milli landa ekki einu vegalengdirnar sem blasi við flugmönnum félagsins er þeir setjast við stjórnvölinn, þar fari einnig verulegar fjarlægðir upp í laun erlendra starfssystkina þeirra. AFP

Alf Hansen, formaður stéttarfélags flugmanna Norwegian, bendir hins vegar á að flugmenn hafi setið eftir í fimmtán ár miðað við hækkanir annarra stétta fluggeirans.

„Við höfum nánast staðið í stað í launum í mörg ár eða verið með launin í frysti,“ segir Hansen, „stjórnendur okkar hafa ekki átt möguleika á að fylgja með í launahækkunum annarra. Þess vegna stöndum við nú mun aftar en þeir sem notið hafa hefðbundinna hækkana í faginu.“

Bendir hann enn fremur á að vegalengdir milli landa séu ekki þær einu sem hans fólk standi frammi fyrir þegar það horfi til erlendra flugstjóra, þar nemi vegalengdir í launum mörg hundruð þúsund norskum krónum á ári.

Frestur NHO Luftfart og Parat til að ná samningum er til miðnættis annað kvöld, föstudag.

NRK
Dagbladet
Nettavisen

• Blogga um frétt