Vonbrigði með hve lítið er bætt við kvóta

„Þetta hljóta að vera vonbrigði. Það lítur út fyrir að töluvert sé af loðnu á miðunum vegna þess hvernig veiðin hefur gengið. Almennt er tónninn þannig í sjómönnum og sömu fréttir berast frá norsku loðnuskipunum,“ segir Gunnþór Ingvason, framkvæmdastjóri Síldarvinnslunnar á Norðfirði, um ráðgjöf Hafrannsóknastofnunar um að auka heildaraflamark í loðnu aðeins um 77 þúsund tonn.

Sjávarútvegsráðherra úthlutaði 208 þúsund tonna upphafskvóta í loðnu eftir mælingar á stofninum í september og október. Loðnan var mæld að nýju nú í janúar.

Minni kvóti en í fyrra

Hafrannsóknastofnun mat að stofninn væri 849 þúsund tonn um miðjan janúar að teknu tilliti til þess afla sem þá hafði þegar veiðst. Í samræmi við samþykkta aflareglu sem grundvallast á því að skilja eftir 150 þúsund tonn til hrygningar, auk annarra forsendna var það niðurstaða Hafrannsóknastofnunar að leggja til að heildaraflamark á vertíðinni verði 285 þúsund tonn sem er 77 þúsund tonnum meira en ákvarðað var í upphafi. Er þetta minni kvóti en á síðustu vertíð þegar hann var 299 þúsund tonn.

Lestu meira

Leggja til 285 þúsund tonna kvóta

Gunnþór segir að fara þurfi ofan í aflaregluna. Meta þurfi forsendur sem lagt var upp með í nýrri aflareglu vegna þess hversu miklu munar á henni og aflareglunni sem notuð var með góðum árangri í 40 ár. Nefnir hann meðal annars að ótrúleg óvissa sé í mælingunni eða 38% þrátt fyrir að þrjú skip hafi verið að mæla í góðu veðri.

Það dragi mælinguna mikið niður. Gunnþór bendir á að loðna sé dyntóttur fiskur og í fyrra hafi niðurstaða mælinga Hafró verið að ekki mætti veiða neina loðnu. Eftir þrýsting um að kanna málið betur hafi verið hægt að gefa út 300 þúsund tonna kvóta.

Gunnþór segir að viðbótin í fyrra hafi gefið töluverðar tekjur og telur litla áhættu í að fara í nýjar rannsóknir. „Samstarf Hafró, útvegsmanna og sjómanna hefur verið gott við loðnurannsóknir undanfarin ár. Ég reikna með að við sameinumst um að fara í nýjan leiðangur til að ná betur utan um stofninn þannig að hægt verði að nýta hann áfram með sjálfbærum hætti,“ segir Gunnþór.

Frétt af mbl.is

Menn alls staðar varir við loðnu