Raunveruleikastjarnan Kim Kardashian staðfesti í sjónvarpsþætti Andy Cohen í gær að hún og Kanye West ættu von á fjórða barninu. Var þetta í fyrsta skipti sem Kardashian tjáði sig um að von væri á barni en fréttir af barnaláninu birtust í erlendum miðlum í byrjun árs.
Upplýsti hún einnig að barnið væri strákur sem einnig hafði komið fram sem og að von væri á barninu fljótlega.
„Ég varð full í jólapartýinu okkar og sagði einhverjum. Ég man ekki hverjum ég sagði það þar sem ég verð aldrei full,“ sagði Kardashian en barnið kemur í heiminn með hjálp staðgöngumóður.
Fyrir eiga hjónin dótturina North sem er fimm ára, soninn Saint sem er þriggja ára og dótturina Chicago 11 mánaða. Chicago kom einnig í heiminn með hjálp staðgöngumóður en samkvæmt People er önnur kona sem gengur með drenginn.