Leikkonan Angelina Jolie þurfti að halda aftur af tárunum á fyrsta háskóladegi sonar hennar, Maddox Jolie-Pitt, í Suður-Kóreu.
Móðirin fylgdi syni sínum í skólann og fengu þau kynningu á skólanum. Jolie sást tala við aðra nemendur í skólanum og sagði þeim að hún myndi ekki stoppa lengi í höfuðborginni Seoul og færi heim daginn eftir. Hún sagði þeim að hún væri að reyna að halda aftur af tárunum.
Hinn 18 ára Maddox hefur nám sitt í lífefnafræði við Yonsei-háskólann í Suður-Kóreu í haust. Hann er elstur af börnum Jolie og Brad Pitt og því fyrsti unginn sem flýgur úr hreiðrinu.
Seoul er langt frá heimili fjölskyldunnar í Bandaríkjunum, en ekki svo langt frá heimili þeirra í Kambódíu. Systkini hans eru sögð spennt að heimsækja hann til Suður-Kóreu.