Sex ára drengir fengu óvænt fjárframlag frá Jolie

Tveir sex ára gamlir drengir í London, Ayaan Moosa og Mikaeel Ishaaq, fengu heldur betur óvænt fjárframlag þegar Hollwyood-stjarnan Angelina Jolie styrkti góðgerðarsöfnun þeirra. Drengirnir komust fyrst í fréttir í Breltandi fyrir límonaðisölu sína til styrktar fólki í Jemen. 

Jolie, sem er þekkt fyrir góðgerðarstörf sín, fékk veður af framtaki drengjanna og sendi þeim bréf og peninga að því er fram kemur á vef BBC. 

„Kæru Ayaan og Mikaeel.

Takk fyrir það sem þið og vinir ykkar hafið gert til þess að hjálpa börnum í Jemen. Mér þykir leitt að ég kemst ekki til þess að kaupa límonaði hjá ykkur en mig langar samt til að styrkja sölubásinn ykkar,“ skrifaði Angelina Jolie og sendi þeim ástarkveðjur og ríflega peningaupphæð.

Adeela Moosa, móðir Ayaans, segir framtak Jolie frábært. Að sögn hennar hafði Jolie samband við teymi sitt í Bretlandi sem hafði síðan samband við fjölskylduna. Drengirnir vissu ekki hver Jolie var en áttuðu sig á hversu fræg hún var þegar þeim var sýnt brot úr hinum ýmsu kvikmyndum. 

• Blogga um frétt