Kristbjörg Jónasdóttir einkaþjálfari á ekki orð yfir hversu magnaður kvenlíkaminn er. Kristbjörg og Aron Einar Gunnarsson landsliðsfyrirliði eignuðust sitt þriðja barn á dögunum og er Kristbjörg opinská á Instagram hvað varðar fyrstu vikurnar eftir fæðinguna.
Kristbjörgu finnst ótrúlegt hvernig lítil mannvera verður til inni í líkama kvenna og merkilegt hvernig líkami kvenna jafnar sig eftir fæðingu. Með færslunni birti hún myndir af sér gengin 40 vikur, rétt eftir fæðingu og viku eftir fæðingu. Hún minnir þó konur á að það sé ekki auðvelt að jafna sig.
Hún minnist þess hvernig henni leið eftir að hún eignaðist sitt fyrsta barn og hversu blaut á bak við eyrun hún var fyrir komu sonarins. Hún sveif ekki bara um á bleiku skýi með eiginmanni og barni eins og hún hafði ímyndað sér.
„Samdrættir, brunatilfinning sem fylgir því að fæða barnið, saumar eftir að hafa rifnað, gyllinæð, tómleikatilfinningin í maganum eftir að þú lítur enn út fyrir að vera gengin 30 vikur þegar þú gengur út af spítalanum,“ skrifar Kristbjörg og heldur upptalningunni áfram. Svefnlausar nætur, hormónar, brjóstagjöf og svo margt fleira gerir lífið með nýfætt barn ekki einfalt.
„Ég held að þetta sé eitthvað sem við tölum ekki mikið um og mörgum konum finnst þær vera einar á þessum tíma af því að þetta virðist vera eitthvað sem konur skammast sín fyrir að tala um. Mér leið að minnsta kosti þannig.
Við erum allar mismunandi og við upplifum þetta allar á mismunandi hátt en ég held að við getum allar verið sammála um að jafnvel þó að fæðingin og vikurnar á eftir séu ekki heillandi er hin hliðin sú að þetta er það ótrúlegasta sem við fáum að upplifa og eru forréttindi sem ég er mjög þakklát fyrir.
Við konur erum ótrúlegar,“ skrifar Kristbjörg.