Scott Disick, barnsfaðir og fyrrverandi sambýlismaður raunveruleikastjörnunnar Kourtney Kardashians, birti myndir af sér og börnum þeirra um liðna helgi þar sem þau nutu tímans saman við sundlaug á meðan móðir þeirra gekk í hjónaband.
Aðeins örfáum klukkustundum eftir að Kardashian og Travis Barker létu pússa sig saman í dómshúsinu í Santa Barbara-hverfinu í Kaliforníu-ríki á sunnudaginn birti Disick skemmtilegar myndir í sögu á Instagram af sér og börnunum þremur; Mason, Penelope og Scott, við sundlaugina í bakgarði heimilis hans sem staðsett er við Hidden Hills í Los Angeles.
Börnin virtust glöð í bragði og fengu að leika lausum hala úti í garði með föður sínum, sem tók fullan þátt í leiknum.
Myndefnið er sagt staðfesta að börnin hafi ekki verið viðstödd brúðkaupsathöfn móður sinnar og stjúpföður.
Scott Disick og Kourtney Kardashian áttu í ástarsambandi um áratugaskeið og eignuðust saman börnin þrjú. Þrátt fyrir að hafa verið saman allan þennan tíma létu þau aldrei verða að því að innsigla ástina með trúlofun eða brúðkaupi.