Ferðalög | Ferðalög erlendis | mbl | 13.9.2022 | 8:00 | Uppfært 11:11

Bestu sólarstaðir Evrópu í vetur

Ljósmynd/Unsplash/George Lemon

Nú, þegar farið er að hausta, er eitt víst. Veturinn er framundan og með vetrinum kemur kuldi og myrkur. Yfir vetrartímann er gott að geta stokkið í stutta sólarferð til þess að fá smá D-vítamín í kroppinn. Í Evrópu eru þó nokkrir áfangastaðir sem bjóða upp á milt og gott veður yfir vetrartímann.

Condé Nast tók saman sjö áfangastaði í Evrópu með sól og mildu veðri, en á listanum eru áfangastaðir sem bjóða upp á sólríkar strendur en einnig menningu og mikla sögu.

Kanaríeyjar

Þessi fallegi eyjaklasi í Atlandshafinu er afskaplega vinsæll meðal Íslendinga, ekki síður yfir dimmustu mánuðina. Þar á meðal eru eyjarnar Gran Canaria, Tenerife og Lanzarote sem flestir Íslendingar kannast við. Hitastigið í desember er á bilinu 11 til 21 gráða.

Tenerife. Ljósmynd/Unsplash/Maria Bobrova

Madeiraeyjar

Um 400 km norður af Kanaríeyjum leynist lítill eyjaklasi sem tilheyrir Portúgal. Eyjan er tilvalin fyrir þá sem þrá ævintýri og spennu. Þar er vinsælt að fara í fjallahjólreiðar og þeir allra djörfustu hafa mikið dálæti á fallhlífastökki með dúndurútsýni yfir eyjarnar. Ótrúlegir klettar, gljúfur og svartar strendur einkenna eyjuna, en í desember er hitastigið þar á bilinu 15 til 20 gráður.

Madeira eyja. Ljósmynd/Unsplash/Tiago Aguiar

Algarve

Algarve er staðsett í suðurhluta Portúgal. Þar má finna ómótstæðilegar strendur og fallegt landslag. Hitastigið í desember er á bilinu 9 til 18 gráður.

Algarve í Portúgal. Ljósmynd/Pexels/Jo Kassis

Aþena

Aþena er höfuðborg Grikklands og hinn fullkomni áfangastaður fyrir þá sem elska menningu, enda býr borgin yfir mikilli sögu. Hitastigið í desember er á milli 9 til 15 gráður.

Aþena í Grikklandi. Ljósmynd/Unsplash/Despine Galani

Grísku eyjarnar

Það er gríðarlega vinsælt að ferðast til eyja Grikklands á sumrin. Hins vegar er ekkert síðra að kíkja á eyjur eins og Santorini, Paros og Milos á veturna. Hitastigið í desember er á bilinu 12 til 17 gráður og því vel hægt að dýfa tánum ofan í tæran sjóinn.

Milos, Grikklandi. Ljósmynd/Unsplash/David Tip

Sikiley

Sikiley er stærsta eyja Ítalíu og þekkt fyrir mikla fegurð og góðan mat. Sikiley er því hin fullkomna lending fyrir ævintýragjarna matgæðinga sem þrá að komast í smá hita, en hitastigið í desember er á bilinu 11 til 17 gráður.

Sikiley, Ítalíu. Ljósmynd/Pexels/Katarzyna Modrezejewska

Kýpur

Kýpur er eyja austast í Miðjarðarhafi en eyjan er í sérstöku uppáhaldi hjá náttúruunnendum enda náttúran undurfögur og margt að skoða á eyjunni. Vetrarmánuðirnir eru frábær tími til þess að ferðast um Kýpur, en hitastigið í desember er á milli 10 og 19 gráður.