Vilhjálmur prins kom öllum að óvörum þegar hann settist að snæðingi á veitingastaðnum Butero Bistro í Varsjá, Póllandi. Vilhjálmur hefur verið á ferðalagi þar í landi að hitta breskar og pólskar herdeildir nálægt landamærum Úkraínu.
Starfsfólk Vilhjálms átti þar bókað borð á Butero og Vilhjálmur spurði hvort hann mætti ekki slást í hópinn.
Vilhjálmur þótti mjög afslappaður og pantaði sér pólska samloku með svínakjöti og frönskum kartöflum sem kostaði 1300 íslenskar krónur.
Veitingastaðurinn er vinsæll hjá hinsegin fólki en þar eru reglulega haldnir viðburðir eins og karaókí kvöld fyrir dragdrottningar á svæðinu svo fátt eitt sé nefnt.
„Þau sögðust hafa skemmt sér vel. Þau voru hér í þrjá klukkutíma ásamt öðrum gestum staðarins. Hann borðaði samlokuna okkar með bestu lyst og kláraði hana,“ segir Pawel Zasim eigandi staðarins.