Tólf hljómsveitir standa nú eftir með pálmann í höndunum og möguleikann á að hreppa hin eftirsóttu Mercury-verðlaun í Bretlandi fyrir bestu plötu ársins. Verðlaunin eru veitt fyrir bestu nýju tónlist á árinu á Bretlandi og í Írlandi, óháð tónlistarstefnum. Eins og venja er til voru ýmis "örugg" nöfn á listanum yfir hina tilnefndu en þar má líka finna undarlegheit.
Það kemur til dæmis fáum á óvart að plötuna Whatever People Say I Am, That's what Im Not með Arctic Monkeys er að finna á listanum. Hún sló rækilega í gegn í Bretlandi og varð sú plata sem hefur selst hraðast í sögu vinsældalista, en hún fór í meira en 360.000 eintökum í fyrstu vikunni. Platan þykir sigurstrangleg en hún hefur til dæmis að geyma smellinn "I Bet You Look Good On The Dancefloor". Í umsögn dómnefndar segir að á plötunni sé að finna "frábær lög í mjög góðum flutningi".
Eins er platan Eraser með hinum reynda Thom Yorke tilnefnd. Radiohead hefur einmitt tvisvar verið tilnefnd til verðlaunanna og hældi dómnefndin nýju sólóplötunni hans Yorke fyrir "einstakan hljóm og ljóðræna sýn".
Scritti Politti er ekki eini skrattinn í sauðarleggnum á tilnefningalistanum, en á meðal vinsæla efnisins má iðulega finna a.m.k. eina djassplötu. Að þessu sinni er það Melting Pot með Zoe Rahman.
Sigurvegari síðasta árs var Antony and the Johnsons, en það verður tilkynnt hver hlýtur hnossið að þessu sinni 5. september.