Of mikill vindur fyrir ofurhuga sem hyggst svífa frá Mýrdalsjökli til Akureyrar

Franskur ofurhugi stefnir að því að ferðast á snjódreka frá Mýrdalsjökli til Akureyrar á föstudag fyrstur manna, ef veður leyfir. Jerome Josserand er þekktur fyrir afrek sín á snjódreka og heimsmethafi í greininni.

Í umfjöllun um franska ofurhugann í Morgunblaðinu í dag kemur fram, að snjódrekamenn bindi á sig skíði og festa sig við fallhlíf og láta vindinn knýja sig áfram. Jerome er staddur hér á landi ásamt hópi kvikmyndagerðarmanna sem hyggjast kvikmynda afrekið en hópurinn hefur verið á landinu í tvær vikur að bíða eftir rétta tækifærinu.

„Landslagið er ekki erfitt viðureignar því það er flatt og lítið um mikla bratta. Vandræðin tengjast helst vindinum og veðrinu,“ segir Jerome.

Jerome Josserand undirbýr sviftilraunina. Ljósmynd/Marco Stoppato & Amanda Ronzoni