Kenýski Nóbelsverðlaunahafinn Wangari Maathai er látin á sjúkrahúsi í Nairobi þar sem hún gekkst undir meðferð við krabbameini. Hún var 71 árs.
Maathai hlaut friðarverðlaun Nóbels árið 2004 fyrir baráttu sína fyrir umhverfisvernd, kvenréttindum og gagnsæi í stjórnsýslu. Hún er fyrsta afríska konan til að hljóta verðlaunin.
Hún var kosin á þing í Kenýa árið 2002 og gegndi um tíma embætti ráðherra. Hún stofnaði á sínum tíma Græna beltið svonefnda, hreyfingu er stóð að skógrækt í Afríku. Hafa þau plantað á þriðja tug milljóna trjáa.
Ennfremur hafa samtökin barist í þágu menntunar, næringar og annarra mála er einkum hafa varðað brýna hagsmuni kvenna.