Amber Heard, eiginkona leikarans Johnnys Depps, hefur verið ákærð fyrir að flytja tvo hunda þeirra hjóna ólöglega til Ástralíu. Í frétt Sky-sjónvarpsstöðvarinnar kemur fram að viðurlög við brotinu geti verið allt að tíu ára fangelsi.
Parið kom með hunda sína, sem eru af Yorkshire-kyni, til Ástralíu í maí er Depp var þar við tökur á nýjustu kvikmyndinni um sjóræningjann Jack Sparrow. Hundarnir, Pistol og Boo, voru fluttir þangað um borð í einkaþotu.
Landbúnaðarráðherra Ástralíu komst á snoðir um málið og sagði við það tilefni: „Ef við leyfum kvikmyndastjörnum, jafnvel þó að þær hafi verið kosnar kynþokkafyllstu manneskjur heims tvisvar, að koma til landsins okkar með gæludýr, af hverju brjótum við þá ekki lögin fyrir alla?“