Braut 10.000 niðurhala múrinn

Grein Kristjáns Kristjánssonar, prófessors í heimspeki við Háskólann í Birmingham, varð á dögunum fyrsta greinin sem birst hefur í tímaritinu „British Journal of Educational Studies“ til þess að vera sótt af netinu oftar en 10.000 sinnum.

Greinin fjallar um mannkostamenntun sem gengur út á að mannkostir geti oft skipt meira máli en greindarvísitala þegar kemur að farsæld í lífi og starfi. Kristján og starfsfélagar hans í Birmingham hafa mikið rannsakað hvernig hægt sé að efla mannkosti og mjúka þætti hjá nemendum á ýmsum stigum menntakerfisins.

Kristján er aðstoðatforstjóri Miðstöðvar mannkosta og dyggða í Birmingham-háskóla en rannsóknir stofnunarinnar og kennsluefni hafa alla jafna vakið mikla athygli og umræður í Bretlandi. 

Kristján segist vera ánægður yfir því að fólk lesi greinina þar sem fræðigreinar fái oft dræma lesningu. Þó segist hann þó ekki halda að vinsældir greinarinnar tengist Heimsmeistaramótinu í Knattspyrnu og þeirri gríðarlegu athygli sem Íslendingar hafa fengið í kjölfar leiks íslenska karlalandsliðsins við lið Argentínu síðasta laugardag.

Grein Kristjáns má finna hér.

• Blogga um frétt