Veröld/Fólk | mbl | 23.7.2018 | 11:14

Strætó með hraðferðir á tónleika Guns N’ Roses

Axl Rose söngvari og Slash gítarleikari á tónleikum Guns N' Roses á Parken í Kaupmannahöfn í lok júní. Þeir sem ætla að mæta á tónleika þeirra í Laugardalnum á morgun eru hvattir til að mæta snemma. AFP

Skipuleggjendur tónleika Guns N‘Roses hvetja tónleikagesti til að mæta tímanlega á Laugardalsvöll til að forðast raðir, en tónleikarnir verða einir þeir fjölmennustu sem haldnir hafa verið hér á landi. Völlurinn opnar klukkan 16.30 og fljótlega eftir það stígur hljómsveitin Brain Police á svið.

Eru tónleikagestir hvattir til að nýta sér almenningssamgöngur, ganga eða hjóla. Boðið verður upp á sérstakar hraðferðir Strætó frá þremur stöðum í borginni og beint niður í Laugardal. Þessar hraðferðir munu fara frá Háskólanum í Reykjavik, Mjóddinni og Strætóstoppistöðinni norðanmegin við Kringluna (hjá Orkunni). Mælt er með því að fólk leggi á bílastæðinu við Sjóvá og fyrir aftan Verslunarskólann.

Sömu leiðir munu fara frá Laugardalshöll við Suðurlandsbraut og til baka eftir tónleika. Miðahafar á tónleikana fá frítt í þessar ferðir gegn framvísun miða.

Reykjavegur verður lokaður fyrir og á meðan tónleikum stendur og þá verður Engjavegur lokaður frá klukkan 16 nema fyrir tónleikagesti. Suðurlandsbraut verður síðan lokuð að hluta eftir að tónleikum lýkur. Bestu staðirnir til þess að hleypa fólki út úr leigu- eða fólksbílum eru við Glæsibæ eða á Sundlaugarvegi.

Bílastæðin í kringum Laugardalshöllina eru opin en til þess a leggja þurfa að vera fjórir eða fleiri miðahafar í bíl.