Rannsaka þjófnað á demantsskreyttu nestisboxi

Lögregla í indversku borginni Hyderabad rannsakar nú þjófnað á demantsskreyttu nestisboxi úr gulli sem var í eigu fyrrverandi konungsfjölskyldu, að því er BBC greinir frá.

Þjófarnir stálu einnig rúbínskreyttum tebolla úr skíragulli, undirskál og teskeið. Tesettið vegur um þrjú kíló og er metið á andvirði um 760 milljóna króna.

Munirnir höfðu verið í eigu Mirs Osmans Alis Khans, síðasta konungs Hyderabad og eitt sinn ríkasta manns í heimi.

Stuldurinn uppgötvaðist á mánudagsmorgun og grunar lögreglu að þjófarnir hafi verið að verki þá um nóttina, en munirnir voru teknir úr sýningarhvelfingu þar sem þeir voru hafðir til sýnis í Nizam-höll, sem nú er safn.

Sverði í eigu þessarar sömu konungsfjölskyldu var stolið úr öðru safni í borginni fyrir 10 árum.

BBC hefur eftir lögreglu að tveir einstaklingar séu grunaðir um þjófnaðinn um helgina, en að sögn indverska dagblaðsins Hindustan Times áttu þjófarnir við eftirlitsmyndavélar svo þjófnaðurinn er ekki til á mynd. Þá skrúfuðu þeir glerdyr af sýningarskápnum til að forðast skemmdir á mununum.

Nizam-safnið var opnað almenningi árið 2000 og er stærstur hluti sýningarinnar dýrar gjafir sem Mir Osman Ali Khan voru gefnar árið 1937. Khan réð þá yfir stærsta konungdæmi Indlands. Hann lést árið 1967, en sögur voru sagðar af auði hans. Átti Khan m.a. Jacob-demantinn sem var á stærð við egg, sem og marga aðra einstaka skartgripi.

• Blogga um frétt