Á þessum árstíma tíðkast að fólk hugsi um sinn minnsta bróður og gefi til samfélagsins. Samkaup færði Fjölskylduhjálp og Hjálparstofnun Kirkjunnar milljón sem gilda sem gjafakort í verslanirnar.
„Verslanir Samkaupa, sem reka Nettó, leggja áherslu á samfélagslega ábyrgð í allri sinni starfsemi sem endurspeglar metnað fyrirtækisins til að vera traustur og virkur þátttakandi í samfélaginu. Árlega styrkir fyrirtækið verkefni m.a. á sviði góðgerðarmála, æskulýðs- og forvarnarstarfa, heilbrigðs lífsstíls og umhverfismála. Núna fyrir jólin færði Nettó Fjölskylduhjálp Íslands og Hjálparstarfi kirkjunnar gjafakort í verslanir fyrirtækisins að verðmæti ein milljón króna,“ segir Ingibjörg Ásta Halldórsdóttir markaðsstjóri Samkaupa. Hún færði Ásgerði Jónu Flosadóttur, formanni Fjölskylduhjálpar Íslands og Bjarna Gíslasyni framkvæmdastjóra hjá Hjálpastarfi Kirkjunnar gjafakortin.