Ungverska ríkissjónvarpið hefur vísað þátttakanda í undankeppni Eurovision í landinu úr keppni fyrir lagastuld. Lag András Petruska, Help me out of here, þykir of líkt lagi með Vampire Weekend.
Petruska flutti lagið í ungversku undankeppni 9. febrúar og komst áfram í úrslitin, sem fara fram á morgun. Hann var hins vegar rekinn úr keppninni í vikunni fyrir lagastuld og söngvarinn Gergo Oláh tekur þátt í hans stað.
Niðurstaða ungverska ríkissjónvarpsins er á þá leið að lagið sé of líkt White sky með hljómsveitinni Vampire Weekend.
„Þrátt fyrir að mörg vinsæl lög hljómi lík er lag Petruska á of marga vegu líkt lagi Vampire Weekend. Það þýðir að hægt er að líta svo á að laginu Help me out of here hafi verið stolið,“ kom fram í yfirlýsingu vegna málsins.