Bilal Hassani, sem tekur þátt fyrir hönd Frakklands í Eurovision-söngvakeppninni í Tel Aviv í maí, hefur neitað orðrómi þess efnis að Frakkar hafi hótað því að sniðganga keppnina.
„Við tökum þátt,“ sagði Hassani, sem er 19 ára, við ísraelska fjölmiðla en hann kom þangað í gær til að taka upp myndband í tengslum við keppnina. Hassani bætti því við að honum hefði verið vel tekið í Ísrael og að hann hlakkaði til keppninnar í vor.
Í síðustu viku greindi ísraelska fréttasíðan Haaretz frá því að Frakkar hefðu hótað því að sniðganga Eurovision. Ástæðan væri ísraelsk sjónvarpssería sem lýsti inngöngu Frakka í söngvakeppni sem hryðjuverki.
Í sjónvarpsseríunni, sem frumsýnd verður í maí og kallast „Tólf stig“, er fylgst með fransk-alsírskum hryðjuverkamanni. Hann þykist vera samkynhneigður karlmaður og tekst að komast í lokakeppni alþjóðlegrar söngvakeppni í þeim eina tilgangi að fremja hryðjuverk í beinni sjónvarpsútsendingu.
Fyrirhugaðir þættir hafa vakið reiði í Frakklandi en Bilal Hassani er samkynhneigður múslimi. Hann kom út úr skápnum fyrir tveimur árum þegar hann sendi frá sér lagið „Hold your Hand”.
Frakkar eiga öruggt sæti í úrslitakvöldi Eurovision en veðbankar spá lagi Hassani, „Roi“, níunda sæti. Rússneska lagið þykir sigurstranglegast.