Aðdáendur Stranger Things geta andað örlítið léttar en Netflix birti í dag fyrstu stikluna úr þriðju þáttaröðinni og ljóst er að von er á stórkostlegri skemmtun 4. júlí, á þjóðhátíðardegi Bandaríkjanna, þegar þáttaröðin verður aðgengileg á Netflix.
„Eitt sumar getur breytt öllu,“ segir í stiklunni þar sem sjá má allar aðalpersónur þáttanna, í örlítið breyttri mynd þó þar sem unglingsárin hafa tekið yfir. „Við erum ekki krakkar lengur!“ heyrist Mike meðal annars segja í stiklunni. Það verður því fróðlegt að fylgjast með uppátækjum Eleven (Millie Bobby Brown), Mike (Finn Wolfhard), Dustin (Gaten Matarazzo), Lucas (Caleb McLaughlin), Will (Noah Schnapp) og Sadie Sink (Max).
Síðasta þáttaröð gerðist í kringum hrekkjavökuna 1984 en í þeirri nýjustu er hoppað fram í sumarið 1985.
Búast má við að líkt og í fyrri þáttaröðunum muni yfirnáttúruleg öfl, dúndrandi „eighties“-smellir, skrautlegar hárteygjur og skírskotanir í Stephen King, Steven Spielberg og The Goonies einkenna þáttaröðina.
Sjón er sögu ríkari og hér má sjá stikluna í heild sinni: