Óþekkjanleg á forsíðu V-Magazine

Tónlistarkonan Billie Eilish er heldur ólík sjálfri sér og sínum fatastíl á forsíðu V-Magazine. Hin 17 ára gamla Eilish prýðir 20 ára afmælisforsíðu tímaritsins.

Fyrst var talið að hún væri í brúðarkjól frá Viktoríu-tímanum en í ljós hefur komið að hún er í skikkju frá Gucci.

Frétt af mbl.is

Furðulegur fatastíll Billie Eilish

Í myndunum í blaðinu er hún þó líkari sjálfri sér með hauskúpusólgleraugu, en hún er þekkt fyrir einstakan stíl sinn. Í viðtalinu segir Eilish að hún hafi alltaf viljað klæða sig svo fólk taki eftir henni, jafnvel áður en hún varð fræg. 

Eilish er aðeins 17 ára gömul og varð fræg þegar hún var 14 ára gömul. Hún deilir því með spyrlinum, Pharrel Williams, að það hafi verið sótt hart að henni þegar hún var að hefja feril sinn. Hún hafi þó aldrei látið neinn ráðskast með sig og reynt að vera eins mikið hún sjálf og hún gat. 

Williams spyr hana hvað sé mesta vitleysan sem hún hefur heyrt um sjálfa sig. Hún segir að staðhæfingar um að hún klæðist víðum fötum til þess að forðast það að verða kyngerð sé algjör vitleysa. Hún segist alls ekki vera hrifin af þannig hrósi um klæðaburð sinn. 

„Ég klæði mig ekki endilega mjög kvenlega, eða stelpulega eða hvað sem það kallast. Ég klæðist víðu drasli og klæðist því sem mig langar. Ég hugsa ekki „Ég ætla að fara í víð föt af því þau eru víð.“ Það er aldrei þannig. Það er meira að ég fer í það sem mig langar til að fara í. En auðvitað halda allir að það sé „Hún er að segja nei við því að vera kyngerð“ og „Hún neitar staðalímyndum um konur.“ Þetta er mjög skrítið því ég veit að það sem ég heyri er jákvætt eða fólk er að reyna að vera jákvætt um hvernig ég klæði mig,“ segir Eilish.

• Blogga um frétt