Undanúrslitakvöld Skrekks, hæfileikahátíðar skóla- og frístundasviðs Reykjavíkur, fer fram dagana 4., 5. og 6. nóvember klukkan átta í Borgarleikhúsinu. Fulltrúar átta grunnskóla í Reykjavík keppa á sviðinu á hverju undanúrslitakvöldi með það að markmiði að komast á lokahátíðina.
Árbæjarskóli fór með sigur af hólmi árin 2018 og 2017 en að þessu sinni keppa 24 grunnskólar um sigurinn. Hægt er að fylgjast með vefútsendingu á UngRúv en úrslitakvöldið verður sýnt í beinni útsendingu á RÚV 11. nóvember.
Í ár taka 600 unglingar þátt í frumsömdum atriðum sinna skóla og spreyta sig í leiklist, söng, dansi, hljóðfæraleik, búningahönnun, förðun, ljósum, hljóði og annarri sviðsvinnu.
Dómnefnd í undanúrslitum skipa þau Greta Salóme, Donna Cruz, Ernesto Camilo, Viktor Örn og Sigfríður Björnsdóttir, formaður dómnefndar.