„Anna prinsessa hunsaði ekki Trump-hjónin og drottningin lét hana ekki heyra það í kjölfarið.“ Þetta skrifar Valentine Low, blaðamaður breska blaðsins The Times, á Twitter en töluvert var gert úr því í gær að prinsessan hefði ekki heilsað Donald Trump Bandaríkjaforseta.
Meint atvik átti sér stað þegar Elísabet drottning og Anna heilsuðu leiðtogum ríkja Atlantshafsbandalagsins í Buckingham-höll í London á þriðjudagskvöld. Leiðtogarnir voru þangað komnir vegna fundahalda í tilefni af 70 ára afmæli bandalagsins.
Low útskýrir að drottningin hafi heilsað bandarísku forsetahjónunum og í framhaldinu snúið sér að Önnu dóttur sinni til að sjá hver væri næstur í röðinni en þá kom í ljós að Trump var síðasti leiðtoginn til að heilsa drottningunni.
Anna hafi þá lyft höndum upp í loft hlæjandi og sagt að drottningin ætti bara eftir að taka í höndina á henni og starfsfólkinu í höllinni.
Low bætir því við að þetta sé sannleikurinn þó það hljómi ef til vill betur að Anna hafi yppt öxlum og sleppt því að heilsa Trump.
OK, here goes... Princess Anne: the truth. No, she didn't snub the Trumps. And she wasn't told off by the Queen.
— Valentine Low (@valentinelow) December 4, 2019
1/5