Icelandair verður einn bakhjarla Evrópsku kvikmyndaverðlaunanna, sem fram fara í Reykjavík á næsta ári. Samkomulag þessa efnis var undirritað í bústað sendiherra Íslands í Berlín, en Evrópsku kvikmyndaverðlaunahátíðin fara fram þar í borg á morgun.
Ingvar E. Sigurðsson er tilnefndur sem besti evrópski leikarinn fyrir leik sinn í mynd Hlyns Pálmasonar, Hvítur, hvítur dagur. Í tilefni hátíðarinnar bauð María Erla Marelsdóttir, sendiherra Íslands í Þýskalandi til móttöku til heiðurs Ingvari þar sem tilnefningunni var fagnað.
Verðlaunahátíðin, sem segja má að séu hin evrópsku Óskarsverðlaun, fer fram á hverju ári. Annað hvort ár er hún haldin í Berlín, þar sem höfuðstöðvar Evrópsku kvikmyndaakademíunnar eru, eða í mismunandi borgum Evrópu. Á næsta ári verður hátíðin haldin í fyrsta sinn á Íslandi og fer hún fram í Hörpu 12. desember 2020.
Undirbúningur er þegar hafinn, enda er þetta umfangsmikið verkefni sem unnið er í samstarfi íslenska ríkisins, Reykjavíkurborgar og Evrópsku kvikmyndaakademíunnar.
Samkomulag um stuðning Icelandair við hátíðina á næsta ári var undirritað í bústað sendiherra Íslands í Berlín af Örnu Schram, sviðsstjóra menningar- og ferðamálasviðs Reykjavíkurborgar og formanni stjórnar EFA 2020, og Gísla S. Brynjólfssyni, markaðsstjóra Icelandair. Viðstödd undirritunina voru meðal annars Dagur B. Eggertsson borgarstjóri, Laufey Guðjónsdóttir forstöðumaður Kvikmyndamiðstöðvar Íslands og Ingvar E. Sigurðsson.