Fyrirsætan Chrissy Teigen opnar sig um brjóstastækkun sem hún fór í þegar hún var tvítug í nýjasta tölublaði Glamour. Er þetta í fyrsta skipti sem hin 34 ára gamla fyrirsæta opnar sig um aðgerðina.
Teigen segist hafa farið í aðgerðina til þess að líta betur út í sundfötum en hún hóf ferilinn sem sundfatafyrirsæta. Sem sundfatafyrirsæta þurfti hún að liggja á bakinu fyrir framan myndavél og var markmiðið að brjóstin litu vel út í stellingunni. Hún segist ekki hafa farið upp um skálastærð með aðgerðinni heldur látið gera brjóstin stinnari og hringlaga.
Teigen á tvö börn með eiginmanni sínum, tónlistarmanninum John Legend.
„Svo eignast þú börn og brjóstin verða full af mjólk og vindlaus og nú er ég í vondum málum,“ segir Teigen sem vill fyllinguna úr líkama sínum. Hún segir að það eigi að skipta um fyllingu á tíu ára fresti en vegna barneigna hafi hún ekki viljað fara í aðgerðina. Hún vildi ekki eiga það á hættu að deyja í skurðaðgerð á brjóstum.