Tónlistarkonan Lana Del Rey er hætt með kærasta sínum, lögreglumanninum Sean Larkin. Larkin sem er bæði lögreglumaður og raunveruleikastjarna staðfesti sambandsslitin í viðtali við The New York Times.
Parið kynntist síðasta haust og var Del Rey fljót að staðfesta sambandið opinberlega. Larkin mætti með henni á Grammy-verðlaunin í janúar en nú er allt búið. „Akkúrat núna erum við bara vinir,“ sagði Larkin í viðtalinu. „Við tölum enn saman og svona, við höfum bara mjög mikið að gera akkúrat núna.“
Larkin og Del Rey unnu bæði mikið og bjuggu ekki í sömu borginni í Bandaríkjunum. Tíminn sem þau höfðu hvort fyrir annað var því af skornum skammti en þegar þau voru saman voru þau bara venjulegt par að sögn Larkins.