Sturla Atlas verður Rómeó

Sigurbjartur Sturla Atlason og Ebba Katrín Finnsdóttir.
Sigurbjartur Sturla Atlason og Ebba Katrín Finnsdóttir. Ljósmynd/Aðsend

Sturla Atlas verður Rómeó í uppsetningu Þjóðleikhússins og segir í fréttatilkynningu að hann hafi verið valinn úr hópi um 100 umsækjenda. Ebba Katrín Finnsdóttir fer með hlutverk Júlíu. 

Þjóðleikhúsið undirbýr uppsetningu á Rómeó og Júlíu eftir William Shakespeare í leikstjórn Þorleifs Arnar Arnarssonar. „Það hefur legið ljóst fyrir um nokkurn tíma að Ebba Katrín Finnsdóttir muni fara með hlutverk Júlíu, en ákveðið var að halda prufur fyrir leikara á aldrinum 20-30 ára til að finna hinn eina rétta í hlutverk Rómeós. Fjórtán leikurum var boðið í ítarlegar prufur fyrir hlutverkið en alls höfðu um 100 sótt um. Sturla Atlas var á endanum sá sem hreppti hnossið.  
 
Sigurbjartur Sturla Atlason, eða Sturla Atlas eins og hann er eflaust betur þekktur, hefur verið áberandi á undanförnum árum sem leikari en ekki síður sem einn vinsælasti tónlistarmaður landsins meðal ungs fólks. Hann var útnefndur bjartasta vonin á Íslensku tónlistarverðlaununum árið 2016 og hefur nýverið sent frá sér plötuna Paranoia sem hefur fengið frábærar viðtökur. Eftirminnileg eru hlutverk hans í Ófærð 2 og kvikmyndinni Lof mér að falla svo fátt eitt sé nefnt. Æfingar á Rómeó og Júlíu hefjast snemma á næsta ári en verkið verður frumsýnt í mars 2021,“ segir í fréttatilkynningu. 

Þorleifur Arnar Arnarsson, Sturla Atlas og Ebba Katrín Finnsdóttir.
Þorleifur Arnar Arnarsson, Sturla Atlas og Ebba Katrín Finnsdóttir. Ljósmynd/Aðsend

Ebba Katrín Finnsdóttir útskrifaðist úr leiklistardeild Listaháskóla Íslands fyrir tveimur árum. Hún lék aðalhlutverkið í sjónvarpsþáttaröðinni Mannasiðum á RÚV. Þá lék hún nokkur hlutverk á samningi í Borgarleikhúsinu í fyrra og á þessu leikári lék Ebba Katrín aðalhlutverkið, Uglu, í Atómstöðinni og burðarhlutverk í Þitt eigið leikrit II í Þjóðleikhúsinu.  

mbl.is

Stjörnuspá »

Hrútur

Sign icon Þú hefur skilað góðu verki og átt skilið að njóta góðra stunda af því tilefni. Vondu fréttirnar eru hins vegar þær að þú þarft að standa fyrir máli þínu.

Stjörnuspá »

Hrútur

Sign icon Þú hefur skilað góðu verki og átt skilið að njóta góðra stunda af því tilefni. Vondu fréttirnar eru hins vegar þær að þú þarft að standa fyrir máli þínu.