Karl Bretaprins og Kamilla hertogaynja hafa verið dugleg að fara í heimsóknir víða um Bretland síðustu daga. Heimsóknunum fylgir að sjálfsögðu að hitta mikið af fólki en prinsinn sýnir gott fordæmi fyrir bresku þjóðina og heiminn allar og heilsar ekki með handabandi.
Karl heimsótti starfsfólk almenningssamgangna í London í gær. Karl virtist ansi kátur í heimsókninni og skrúfaði niður rúðuna og brosti til ljósmyndara á staðnum.
Hann virtist vera jafn kátur á miðvikudaginn þegar hann heimsótti stjörnubóndann Adam Henson á Cotsworld Farm Park til að hvetja Breta til að ferðast innanlands í sumar.
Karl er mikið náttúrubarn og virtist vera einstaklega hrifinn af dýrunum í sveitinni.
Karl og Kamilla voru manna fyrst í bresku konungsfjölskyldunni til þess að snúa aftur í opinberar heimsóknir og viðburði en þau snéru aftur þann 16. júní. Karl veiktist af veirunni í mars síðastliðinn en var ansi fljótur að ná sér.