Það verður heldur betur húrrandi stemning í kvöld, föstudaginn 16.júlí, í Kvosinni á tónleika og skemmtistaðnum Húrra sem opnar aftur með pomp og prakt við Tryggvagötu 22 í Reykjavík þegar hljómsveitin Hipsumhaps stígur á stokk.
Húrra var einn farsælasti tónleika og skemmtistaður síðasta áratugar í miðborg Reykjavíkur. Það er athafnamaðurinn Jón Mýrdal sem stendur að enduropnun staðarins en Jón opnaði Húrra fyrst 2014. Blaðamaður náði tali af Jóni þar sem hann var staddur í veiði norður í landi. „Það er alltof gott veður hérna, hentar mér ekki nógu vel í augnablikinu,“ sagði Jón aðspurður um hina norðlensku sumarblíðu, en veiðin er heldur dræmari í blíðviðri.
Það má hinsvegar segja að það létti til fyrir íslenskt tónlistarlíf með enduropnun Húrra. Framboðið á tónleikastöðum í miðborginni er lítið sem ekkert og verður spennandi að fylgjast með tónleikadagskrá Húrra næstu mánuði. „Við stefnum á að vera með tónleika alla fimmtudaga, föstudaga og laugardaga og nú þegar hafa fjölmargar hljómsveitir haft samband við okkur. Í kvöld verður opnunarpartí þar sem Hipsumhaps spila og það er frítt inn og allir velkomnir,“ segir Jón.
Nýverið opnaði Jón djassknæpuna Skuggabaldur við hlið Hótel Borgar við Austurvöll í rými sem hýsti áður Kaffibrennsluna og veitingastaðinn Nora Magasin við Pósthússtræti 9. Aðspurður hvers vegna hann hafi tekið þá ákvörðun að enduropna Húrra segir hann að það hafi verið haft samband við hann. „Ég kann þetta og geri þetta vel. Þetta er eina sem ég kann. Svo þegar ég fann litanúmerið af gömlu málningunni sem ég notaði þegar ég opnaði Húrra 2014 þá var þetta ekki spurning og ég sló til.“
Farsæll ferill Húrra hófst 2014 þegar athafnamaðurinn Jón opnaði tónleika og skemmtistaðinn við Tryggvagötu 22 þar sem Gaukur á Stöng var til húsa í áraraðir. Þetta var annar barinn sem Jón opnaði á skömmum tíma, en árið 2013 opnaði hann Bravó á horni Klapparstígs og Laugarvegs. Staðurinn sló samstundis í gegn, en Húrra bauð upp á lifandi tónleika í hverri viku og um helgar sáu plötusnúðar til þess að dansþyrstir gestir dönsuðu til klukkan hálffimm á morgnana. Jón fékk til liðs við sig vaska menn sem sáu um bókanir á staðnum, tónlistarmanninn Snorra Helgason og plötusnúðinn og útvarpsmanninn Óla Dóra.
Jón seldi reksturinn 2018 og ári síðar lokar staðurinn þegar nýir rekstraraðilar opna íþróttabarinn Gumma Ben við litlar vinsældir og varð hann skammlífur.
Nú birtir loks til í Reykjavík, að minnsta kosti fyrir tónlistarunnendur.
Þrefalt húrra fyrir því. Húrra, húrra, húrra.