Auðkýfingurinn og athafnamaðurinn Elon Musk og tónlistarkonan Grimes hafa slitið sambandi sínu. Musk staðfesti við Page Six að þau væru hálf-skilin að borði og sæng en væru í góðu sambandi.
Musk og Grimes eiga saman sonin X Æ A-Xii Musk sem er eins árs gamall. „Við erum hálf-skilin en elskum hvort annað og hittumst reglulega og eigum í góðum samskiptum,“ sagði Musk.
Musk sagði að ástæðan fyrir sambandsslitunum væri aðallega sú að vinna hans við SpaceX og Tesla krefðist þess af honum að vera í Texas eða á ferðalagi um heiminn. Grimes væri hins vegar að vinna að tónlist sinni í Los Angeles.
Parið hefur verið saman frá árinu 2018 og eignuðust þau son árið 2020. Þau voru síðast saman á opinberum vettvangi á Met Gala-kvöldinu fyrr í þessum mánuði.