Söng- og leikkonan Jennifer Lopez er sögð allt annað en sátt með kærastann sinn, leikarann Ben Affleck, eftir nýlegt viðtal hans. Margir túlkuðu viðtal Afflecks, sem er óvirkur alkóhólisti, þannig að hann kenndi fyrrverandi eiginkonu sinni, Jennifer Garner, um drykkju sína í hjónabandi þeirra.
„Við reyndum að halda hjónabandinu gangandi vegna þess að við eigum börn saman. Mér fannst ég svolítið fastur. Ef við hefðum ekki skilið væri ég líklega enn að drekka,“ er haft eftir Affleck. Affleck og Garner tilkynntu skilnað árið 2015 en skildu formlega árið 2018.
Heimildarmenn Page Six sem þekkja til Jennifer Lopez segja að hún sé ósátt við ummæli Afflecks. „[Lopez] er mjög pirruð,“ sagði heimildarmaður. „Hún er dregin inn í þetta af því hún er að hitta hann. Hún vill ekki vera dregin inn í þetta.“
Affleck reyndi að koma orðum sínum betur til skila í þætti Jimmys Kimmels í gær. „Ég myndi aldrei vilja að börnin mín héldu að ég segði eitthvað slæmt um móður þeirra,“ sagði Affleck í þætti Kimmels. Affleck var ánægður með viðtalið þangað til hann sá fréttirnar upp úr því og hvernig þær voru slitnar úr samhengi að hans mati.
Lopez og Affleck byrjuðu saman fyrr á þessu ári en þau voru einnig saman í byrjun aldarinnar. Lepez er sögð vera að reyna að kynnast fyrrverandi eiginkonu Afflecks, leikkonunni Jennifer Garner, og börnum þeirra þremur. Heimildarmaðurinn bendir á að orð Afflecks hafi verið tillitslaus.