Hefur sett Loga Geimgengil á hilluna
Mark Hamill mun líklega aldrei aftur berjast með geislasverð.
AFP
Leikarinn Mark Hamill sér enga ástæðu til þess að leika Luke Skywalker á ný. Hann segist hafa notið þess að leika Jedi-riddarann í Stjörnustríðsmyndunum, en nú sé sá tími liðinn.
Kemur þetta fram í nýlegu viðtali CBS við hinn 71 árs gamla Hamill. Segist hann hvorki vilja né geta sagt til um hvort hann muni birtast aftur á skjánum sem Luke Skywalker. Hamill vill þó aldrei segja aldrei en segir þó að handritshöfundar og framleiðendur Stjörnustríðsheimsins þurfi ekki lengur á hinum fullorðna Luke Skywalker að halda, því þeir hafi svo margar aðrar sögur að segja.
