„Stökkvum ekki á einhverjar tískubylgjur“
Setja bókamerki
„Staðurinn lagar sig rólega að þörfum og væntingum hverrar kynslóðar. Þess vegna er hann enn til eftir öll þessi ár og enn á sömu kennitölu,“ segir Ægir Dagsson framkvæmdastjóri Kaffibarsins. Því er fagnað um helgina að þrjátíu ár eru liðin síðan þessi goðsagnakenndi skemmtistaður var opnaður við Bergstaðastræti en hann hefur alla tíð haldið vinsældum sínum þó flestir fastagestir og eigendur á upphafsárunum hafi snúið sér að öðru.
„Auðvitað var þetta kaffihús þegar Kaffibarinn var opnaður en krakkarnir tóku yfir og breyttu í blöndu af skemmtistað, pöbb og bar. Kaffibarinn hefur í það minnsta alltaf verið samkomustaður ungs fólks,“ segir Ægir sem á staðinn í dag ásamt Svani Kristbergssyni. Svanur og Þorsteinn Stephensen keyptu Kaffibarinn árið 2007 af Baltasar Kormáki og Ingvari Þórðarsyni. Þeir félagar keyptu staðinn af upphafsfólkinu, Andrési Magnússyni, Dýrleifu Örlygsdóttur og Friðriki Weisshappel.
Ægir segir að staðurinn sé alltaf í þróun en vel sé passað upp á grunngildin. „Kaffibarinn er íhaldssamur en samt alltaf í þróun. Við stökkvum ekki á einhverjar tískubylgjur.“
Stíf dagskrá er á Kaffibarnum um helgina í tilefni afmælisins. Hún hófst í gær og um klukkan 15 í dag hefjast leikar á ný þegar margir þekktir plötusnúðar sem komið hafa þar fram í gegnum tíðina láta til sín taka. Um klukkan 21 í kvöld heldur svo karlakór Kaffibarsins tónleika og í kjölfarið fara leikar að æsast. Ægir hvetur fastagesti Kaffibarsins fyrr og nú til að kíkja við. „Að sjálfsögðu ætla ég að vera þarna og gera vel við mitt fólk.“
Nánar er fjallað um afmælið í Morgunblaðinu í dag.
Kerfið féll á prófinu
Umboðsmaður barna krefur ráðherra um svör
Stafræna byltingin étur börnin sín
„Þú ert bara orðin miðaldra kona“
Sláandi tölur kalla á djúpa greiningu
Hyggst skoða lög um nafnabreytingar
Leitaði að upplýsingum um Kennedy-morðið