Fimm voru heiðraðir í Washington

Fimm listamenn voru heiðraðir í Kennedy Center-listamiðstöðinni í Washington D.C. á sunnudagskvöld. Þetta voru kvikmyndaleikarinn Billy Crystal, sálarsöngkonan Dionne Warwick, Renée Fleming óperusöngkona, Barry Gibb, einn af stofnendum Bee Gees, og tónlistar- og leikkonan Queen Latifah.

Verðlaunin eru veitt árlega til að heiðra listamenn fyrir framlag þeirra til fjölbreyttrar listmenningar. Áður en verðlaunaafhendingin hófst komu heiðursgestirnir saman til kvöldverðar í Hvíta húsinu þar sem Joe Biden Bandaríkjaforseti flutti ávarp.

Robert De Niro, Meg Ryan, Whoopi Goldberg, Kerry Washington, Sigourney Weaver og Michael Bublé voru meðal þeirra sem mættu og hylltu heiðursgesti kvöldsins. Verðlaunin voru fyrst afhent árið 1978 og hafa yfir 250 listamenn verið heiðraðir í gegnum árin.