Bandaríska leikkonan Meryl Streep var heiðruð við hátíðlega athöfn á kvikmyndahátíðinni í Cannes í gærkvöld.
Franska leikkonan Juliette Binoche afhenti leikkonunni heiðurspálmann (e. Honorary Palme d'Or) og hlaut Streep standandi uppklapp sem varði vel og lengi og táraðist hún við móttökurnar.
Heiðurspálminn var veittur í fyrsta sinn árið 1955. Fyrstur til að hljóta þennan heiður var bandaríski leikstjórinn Delbert Mann.
Streep, 74 ára, er margverðlaunuð leikkona og á að baki farsælan leikferil. Enginn leikari hefur hlotið jafn margar tilnefningar til Óskarsverðlaunanna en þær eru 21 talsins. Streep hefur þrívegis hlotið Óskarsverðlaun fyrir leik sinn í kvikmynd.