Bandarískur leikari skotinn til bana

Bandaríski leikarinn Johnny Wactor, best þekktur fyrir leik sinn í hinni geysivinsælu sápuóperu General Hospital, var skotinn til bana í stjörnuborginni Los Angeles aðfaranótt laugardags.

Wactor og ónefndur samstarfsmaður hans urðu vitni að því þegar þrír grímuklæddir menn reyndu að stela hvarfakút af bíl leikarans.

Wactor nálgaðist þremenningana í þeirri von um að koma í veg fyrir þjófnaðinn en einn mannanna þriggja dró þá upp byssu og skaut Wactor.

Leikarinn, sem var 37 ára, var fluttur með hraði á sjúkrahús en var úrskurðaður látinn við komu á bráðamóttökuna.

Þremenningarnir forðuðu sér af vettvangi og er þeirra nú leitað.

• Blogga um frétt