Það var ekki þverfótað fyrir spariklæddu fólki þegar Hátíðarkvöld Þjóðmála var haldið í fyrsta skipti. Gísli Freyr Valdórsson, ritstjóri Þjóðmála setti kvöldið en veislustjórn var í höndum Stefáns Einars Stefánssonar fyrrverandi fréttastjóra viðskipta Morgunblaðsins. Stefán Einar skipulagði kvöldið ásamt Gísla Frey og Herði Ægissyni ritstjóri Innherja. 

Hátíðakvöldið var haldið í gamla Sjálfsstæðissalnum við Austurvöll en áður var skemmtistaðurinn Nasa þar til húsa. Vel var mætt á hátíðarkvöldverðinn en 146 gestir víða úr íslensku atvinnu- og viðskiptalífi skemmtu sér saman. Heiðursgestur var Þórdís Kolbrún Reykfjörð Gylfadóttir og veitt voru verðlaun í sex flokkum. 

Heiðursverðlaun Þjóðmála fyrir ævilangt framlag til íslensks atvinnulífs hlaut Jón Sigurðsson, fyrrverandi forstjóri Össurar en Áslaug Arna Sigurbjörnsdóttir, ráðherra, veitti Jóni verðlaunin. 

Boðið var upp á ljúffengan mat en á meðan á kvöldverði stóð spilaði jazzsveit undir stjórn Ásgeirs Ásgeirssonar fyrir gesti. Svo kom Júníus Meyvant og skemmti og svo lokaði Helgi Björns kvöldinu.