Heilbrigðistæknifyrirtækið Össur hf. er fyrsta íslenska framleiðslufyrirtækið sem hefur fengið staðfestingu frá Science Based Targets initiative (SBTi) fyrir bæði skammtíma- og langtímamarkmið um samdrátt á losun gróðurhúsaloftegunda.

Samkvæmt SBTi byggja loftslagsmarkmið Össurar á vísindalegum grunni og styðja við aðgerðir Parísarsáttmálans um að halda hlýnun jarðar innan við 1,5 gráður, að því er fram kemur í fréttatilkynningu frá fyrirtækinu.

SBTi eru alþjóðleg samtök sem hafa þann tilgang að staðfesta að markmið og aðgerðaráætlanir fyrirtækja og stofnanna séu í samræmi við það sem loftslagsvísindi skilgreina nauðsynlegt til að ná markmiðum Parísarsáttmálans.

Össur hlaut nýlega B í einkunn fyrir stýringu loftslagsáhrifa og afleiðinga loftslagsbreytinga á starfsemi fyrirtækisins hjá alþjóðlegu samtökunum CDP, en meðaleinkunn lækningafyrirtækja er C.