Miðstjórn Alþýðusambands Íslands segir ákvörðun peningastefnunefndar Seðlabanka Íslands um að halda stýrivöxtum óbreyttum óskiljanlega.

Telur miðstjórnin ákvörðunina ganga þvert á fyrri rökstuðning nefndarinnar og vera mikið áhyggjuefni með tilliti til áhrifa á hagkerfið og afkomu almennings.

Þetta kemur fram í ályktun miðstjórnarinnar.

Frétt af mbl.is

Stýrivextir Seðlabankans óbreyttir

Frétt af mbl.is

„4-5% gólf sem við verðum bara að brjótast í gegnum“

Krefjast að yfirvöld standi við skuldbindingar

Minnir miðstjórnin á að verkalýðshreyfingin hafi fallist á hóflegar launahækkanir í síðustu kjarasamningum til að stuðla að hjöðnun verðbólgu og þar með lækkun vaxta. Launafólk í landinu krefjist því þess að ríki og sveitarfélög standi við skuldbindingar sínar og stundi ábyrga hagstjórn til að yfirlýstum markmiðum verði náð.

Vekur miðstjórn athygli á að við síðustu hækkun stýrivaxta Seðlabankans í ágúst árið 2023 hafi peningastefnunefnd sagt hækkunina nauðsynlega með vísun í óvissu um kjarasamninga, spennu í hagkerfinu og undirliggjandi verðbólgu.  

Nú liggi fyrir kjarasamningur til langs tíma sem hafi verið gerður í nafni stöðugleika. Hagtölur sýni að spenna í hagkerfinu fari minnkandi og að undirliggjandi verðbólga hafi hjaðnað. Án áhrifa húsnæðiskostnaðar mælist verðbólga 3,9% og samkvæmt kjarnavísitölu án áhrifa reiknaðrar húsaleigu mælist hún 3,5%.

Frétt af mbl.is

„Farnir að halda verðbólgunni uppi“

Fjármagn flutt frá þeim sem skulda til þeirra sem eiga

Rökstuðningurinn sem borinn var fram í ágúst eigi því augljóslega ekki lengur við, að því er fram kemur í ályktuninni.  

„Við þessar aðstæður kallar nákvæmlega ekkert á að stýrivöxtum sé haldið óbreyttum í 9,25%. Þvert á móti blasir við að forsendur eru til þess að hefja lækkun vaxta,“ segir í ályktuninni. 

„Núverandi vaxtastig felur í sér skipulagðan flutning fjármagns frá þeim sem skulda til þeirra sem eiga peningana. Þannig er ákvörðun peningastefnunefndar fallin til að þjóna hagsmunum fjármagnsafla og auka enn ójöfnuð í landinu. “

Frétt af mbl.is

Vill ekki „aumingjalegar“ lækkanir á röngum tíma

Fasteigna- og leiguverð muni hækka

Segir miðstjórnin neyðarástand ríkja á húsnæðismarkaði og telja megi víst að fasteigna- og leiguverð muni enn fara hækkandi. Slíkar hækkanirnar verði helsti aflvaki verðbólgunnar sem ofurvextir leysi ekki.

Helsta orsök húsnæðiskreppunnar sé getu- og úrræðaleysi ríkis og sveitarfélaga. Skortstefna hvað lóðir varðar haldi uppi fasteignaverði og þar með skatttekjum sveitarfélaga.

„Miðstjórn ASÍ telur þá framgöngu ósiðlega. Óþolandi er með öllu að launafólk í landinu beri kostnaðinn af þeim vítahring húsnæðiskreppu, verðbólgu og vaxta sem skortstefnan veldur.“

Frétt af mbl.is

„Það er verið að slátra íslenskum heimilum“