Brett Kavanaugh, sem Donald Trump Bandaríkjaforseti tilnefndi til setu í Hæstarétti, segist reiðubúinn að „verja heilindi“ sín frammi fyrir öldungadeild þingsins. Kemur fullyrðing hans í kjölfar ásökunar í hans garð um kynferðislegt ofbeldi, sem á að hafa átt sér stað fyrir rúmum þrjátíu árum.
Christina Blasey Ford, bandarískur prófessor á sextugsaldri, steig í gær fram undir nafni og sakaði Kavanaugh um að hafa, í félagi við annan ungan mann, rekið sig inn í svefnherbergi í unglingasamkvæmi á heimili í Montgomery-sýslu. Þeir hafi báðir verið mjög ölvaðir og félaginn hafi horft á meðan Kavanaugh hafi reynt að fá sínu framgengt í rúmi í herberginu, þuklað á henni og misnotað.
„Ég hef aldrei gert neitt í líkingu við það sem ásakandinn lýsir - hvorki við hana né nokkurn annan,“ segir Kavanaugh í yfirlýsingu sem Hvíta húsið gaf út rétt í þessu.
„Ég er tilbúinn að ræða við dómsmálanefnd öldungadeildarinnar með hverjum þeim hætti sem nefndin telur eiga við, til að hrekja þessa röngu ásökun frá því fyrir 36 árum og verja heilindi mín.“