Margrethe Vestager, sem fer með samkeppnismál í framkvæmdastjórn Evrópusambandsins, ætlar að bjóða sig fram í embætti forseta framkvæmdastjórnarinnar. Vestager staðfestir þetta í viðtali við Politiken í dag.
Bandalag frjálslyndra flokka í Evrópu, ALDE, mun væntanlega tilkynna á Evrópuþinginu í dag að Vestager verði í framboði fyrir ALDE í kjöri til forseta en bandalagið leggur fram lista sinn í dag um sæti í framkvæmdastjórninni.
Jean-Claude Juncker, sem í dag gegnir embætti forseta framkvæmdastjórnar ESB, er ekki í framboði en framjóðandi bandalags hægriflokka, EPP, verður Manfred Weber.
Vestager var ráðherra í dönsku ríkisstjórninni áður en hún tók sæti í framkvæmdastjórninni árið 2014. Hún var formaður miðflokksins Radikale Venstre og fór með efnahags- og innanríkismál í samsteypustjórn vinstri- og miðflokka undir forystu Helle Thorning-Schmidt 2011-2014 en hún sat á þingi frá árinu 2001.
Hörð afstaða hennar í garð bandarískra stórfyrirtækja í skattamálum hefur vakið mikla athygli og hefur forseti Bandaríkjanna, Donald Trump, gefið henni viðurnefnið „Skattafrúin“.