Michael Cohen, fyrrverandi lögfræðingur Donalds Trump Bandaríkjaforseta, hóf í dag afplánun á þriggja ára fangelsisdómi sem hann hlaut eftir að hafa lýst sig sekan um brot á lögum um kosningasjóði, m.a. með því að greiða klámmyndaleikkonunni Stormy Daniels og Playboy-fyrirsætunni Karen McDougal fyrir að þegja um samband sitt við forsetann.
Cohen hefur samt sem áður ekki sagt sitt síðasta. „Enn er margt ósagt. Ég hlakka til þess dags þegar ég get sagt sannleikann,“ sagði Cohen við fjölmiðlafólk fyrir utan heimili sitt í Manhattan í morgun áður en hann hélt áleiðis í alríkisfangelsið í Otisville í New York-ríki.
„Ég vona að þegar ég sameinast fjölskyldu og vinum á ný verði Bandaríkin komin á þann stað að hér ríki ekki útlendingahatur, óréttlæti og lygar,“ sagði Cohen.