Glundroði skapaðist í miðborg Árósa í morgun eftir að kýr slapp úr sláturhúsi á atvinnusvæði niðri við hafnarbakkann. Kýrin var sögð bæði árásargjörn og hættuleg manneskjum og endaði lögregla á að neyðast til að skjóta hana, eftir nokkra eftirför.
Greint er frá þessu í staðarblaðinu Aarhus Stiftstidende og því að tilkynning hafi borist um lausagöngu beljunnar kl. 8:58 í morgun, á háannatíma.
Janni Lundager, upplýsingafulltrúi lögreglunnar á Austur-Jótlandi, segir við blaðið að lögregla hafi ákveðið að taka ekki neina áhættu heldur bæði sent mikinn mannskap á staðinn og fyrirskipað léttlestinni sem ekur um borgina að stöðva akstur, en ekki er langt frá sláturhúsinu að lestarteinunum sem þjóna miðborginni.
Kýrin hljóp þó ekki í átt að miðbænum, heldur í átt að smábátahöfn sem liggur ögn utan við þéttasta borgarkjarnann, og fékk lögregla fjölda ábendinga frá borgurum er hún var á leið hennar þangað.
Lögregla fann kúna svo loks kl. 9:42 og tóku lögreglumenn þá ákvörðun um að aflífa hana með skammbyssu.
Kort før kl. 9 stak en ko af fra Aarhus Slagtehus på havnen i Aarhus. Koen blev beskrevet som aggressiv og potentielt farlig, og Letbanen blev derfor bedt om at indstille kørslen, og der blev sendt flere patruljer. Kl. 9.42 blev koen fundet og aflivet af vores betjente #politidk
— Østjyllands Politi (@OjylPoliti) August 13, 2019