Óperusöngvarinn Placido Domingo fékk afar góð viðbrögð áhorfenda í Salsburg í kvöld þar sem áhorfendur stóðu upp og fögnuðu að lokinni sýningu. Þetta er fyrsta skiptið sem Domingo kemur fram opinberlega síðan hann var sakaður um að hafa áreitt konur kynferðislega.
AFP-fréttastofan vísar í umfjöllun austurríska dagblaðsins Kleine Zeitung en Domingo söng í óperu Giuseppe Verdi, Luisa Miller, á árlegri tónlistarhátíð í Austurríki.
AP-fréttaveitan greindi frá ásökunum kvennanna fyrr í mánuðinum. Rætt var við átta söngkonur og einn dansara sem saka Domingo um áreitni. Atvikin sem um ræðir áttu sér stað yfir um þriggja áratuga skeið, allt frá upphafi níunda áratugar síðustu aldar. Segir AP hegðun söngvarans hafa verið vel þekkt leyndarmál innan óperuheimsins.
Í kjölfar ásakana kvennanna hætti Philadelphia Orchestra Association við að fá Domingo til að koma fram á tónleikum 18. september.