Maður er í haldi sænsku lögreglunnar grunaður um að hafa hent konu fyrir lest á aðaljárnbrautarstöðinni í Lundi í gærkvöldi. Konan er alvarlega slösuð á sjúkrahúsi en að sögn varðstjóra í lögreglunni, Magnus Lefèvre, hefur hann ekki nákvæmar upplýsingar um áverka hennar.
Samkvæmt frétt á vef sænska ríkissjónvarpsins, SVT, var maðurinn handtekinn síðar um kvöldið og í nótt hefur lögreglan unnið að tæknirannsókn á vettvangi.
Upplýsingafulltrúi lögreglunnar, Calle Persson, segir að vitni hafi lýst manninum og eins hafi atvikið náðst á upptökur öryggismyndavéla.