Franska lögreglan handtók þrjá Súdana í tengslum við hryðjuverkaárás í suðausturhluta Frakklands í gær. Tveir létust í árásinni.
Árásarmaðurinn, Abdallah Ahmed-Osman, er flóttamaður frá Súdan og búsettur í Romans-sur-Isère, bænum þar sem árásin var gerð. Hann var handtekinn án mótspyrnu.
Árásin var gerð um miðjan dag og réðst árásarmaðurinn á fólkið vopnaður hnífi. Er málið rannsakað sem hryðjuverk. Annar Súdani var handtekinn á heimili Ahmed-Osmans skömmu eftir árásina og síðar um kvöldið var sá þriðji handtekinn en hann er hælisleitandi frá Súdan.
Samkvæmt upplýsingum frá innanríkisráðuneytinu virðist sem Ahmed-Osman hafi verið einn að verki og engin tengsl virðast vera á milli hans og vígasamtaka eins og Ríkis íslams. Þegar hann var handtekinn var hann á hnjánum á gangstéttinni að biðja á arabísku. Ahmed-Osman á að hafa beðið lögreglu að drepa sig þegar hann var handtekinn.
Að sögn vitna kallaði hann Allah Akbar! (Guð er mikill) er hann stakk fórnarlömb sín. Fólkið sem hann stakk fyrst var eigandi tóbaksverslunar og eiginkona hans. Þaðan fór hann til kjötkaupmannsins og náði sér í annan hníf og þaðan í miðbæinn og réðst á fólk fyrir utan bakarí. Fimm særðust og eru tveir þeirra á gjörgæsludeild.
Ahmed-Osman fékk stöðu flóttamanns í Frakklandi árið 2017. Hann hefur aldrei komist í kast við lögin frá því hann kom til landsins. Heima hjá honum fundust handskrifaðir trúarlegir textar þar sem hann kvartar meðal annars yfir trúleysi Frakka.