Smitum meðal barna fjölgað verulega
Setja bókamerki
Mikil aukning hefur orðið á spítalainnlögnum barna í Suður-Afríku eftir að Ómíkron-afbrigði kórónuveirunnar tók að breiðast út um landið. Of snemmt er þó að segja hversu viðkvæm börn eru fyrir hinu nýja afbrigði, að því er suður-afrískir læknar greina frá.
Vísbendingar um að Ómíkron sé afar smitandi
Frá því Ómíkron-afbrigðið var fyrst uppgötvað af vísindamönnum í Suður-Afríku hefur kórónuveiran breiðst hraðar út í landinu en nokkru sinni áður í faraldrinum.
Fyrstu smit komu upp á meðal háskólanema í landinu sem varð til þess að veiran smitaðist hratt á meðal ungs fólks og síðar til eldri borgara.
Samkvæmt vísindamönnum og heilbrigðisyfirvöldum hefur sjúkrahúsinnlögnum barna fjölgað verulega, sérstaklega börnum undir fimm ára aldri en ekki síður barna á aldrinum 10-14 ára.
„Það hefur orðið töluverð aukning í öllum aldurshópum, sérstaklega hjá börnum yngri en fimm ára,“ segir Wassila Jassat, talsmaður sóttvarnarstofnunar Suður-Afríku (NICD), á blaðamannafundi, og vísar þar til sjúkrahúsinnlagna.
„Tíðni sjúkrahúsinnlagna hjá 60 ára og eldri er hæst en þar á eftir koma börn undir fimm ára,“ bætir hún við.
Börn yngri en 12 ára hafa enn ekki verið bólusett í Suður-Afríku og gæti það útskýrt þá stöðu sem nú er uppi í landinu, að sögn vísindamanna.
Michelle Groome, yfirmaður lýðheilsusviðs NICD, segir veiruna breiðast hraðar út nú en nokkurn tímann áður í faraldrinum, sér í lagi í Guateng héraðinu þar sem Jóhannesarborg og höfuðborgin Pretoría eru staðsettar.
„Bráðabirgðagögn benda til þess að Ómíkron-afbrigðið sé afar smitandi og að það komist mögulega framhjá ónæmisvörnum,“ segir hún.
Þrisvar líklegra til að valda endursýkingum
Ómíkron-afbrigðið er þrisvar sinnum líklegra til að valda endursýkingum heldur en Delta- eða Beta-afbrigði veirunnar, að því er suður-afrískir vísindamenn greindu frá á fimmtudag.
Þrátt fyrir að einkenni nýja afbrigðisins séu væg enn sem komið er má búast við því að fólk veikist alvarlega á næstu tveimur vikum, að sögn Groome.
11.535 ný tilfelli greindust í landinu í gær, flest í Gauteng-héraðinu.
Það eru um fimm sinnum fleiri tilvik en tilkynnt voru fyrir viku síðan, þegar Suður-afrískir vísindamenn gerðu heiminum viðvart um hið nýja Ómíkron-afbrigði kórónuveirunnar.
Hvorki sést áður hér á landi né annars staðar
Strand skemmtiferðaskips kallar á erlenda aðstoð
Vonast til að tjaldbúðir við HÍ standi áfram
/frimg/1/29/32/1293273.jpg)
Ekki af baki dottinn og ætlar að opna B5 aftur
Bergnuminn í Hvalfirði
Væri að ljúga ef ég segðist ekki stressaður