Loka sorpbrennslustöðinni í Öræfum
Setja bókamerki
Ákveðið hefur verið að loka sorpbrennslustöðinni að Svínafelli í Öræfum. Stöðin hefur verið rekin síðan 1993.
Sorpbrennslustöðin Brennu-Flosi hf að Svínafelli í Öræfum hefur þjónað íbúum og fyrirtækjum í Öræfum frá árinu 1993 þegar Hofshreppur ásamt ábúendum í Svínafelli I ákváðu að hefja rekstur hennar. Hofshreppur sameinaðist öðrum sveitarfélögum í Austur-Skaftafellssýslu undir merkjum Sveitarfélagsins Hornafjarðar árið 1998.
Samhliða uppbyggingu brennsluofnsins byggði fjölskyldan í Svínafelli I sundlaugina Flosalaug sem hituð var með orku frá brennsluofninum. Sundlaugin hefur þjónað gestum og íbúum Öræfa öll þessi ár og verið mikilvægur hlekkur í ferðaþjónustu.
Í ljósi umræðu um sorpbrennslustöðvar á landinu og umræðu um mengun sem af þeim stafar hafa rekstraraðilar stöðvarinnar og bæjarráð Sveitarfélagsins Hornafjarðar ákveðið að loka sorpbrennslunni. Þar með verður Flosalaug einnig lokað. Ákvörðunin var tekin á fundi bæjarráðs þann 21. febrúar sl.
Tekið verður upp samskonar fyrirkomulag í sorpmálum og annars staðar í sveitarfélaginu. Stefnt er því að hið nýja kerfi taki gildi á allra næstu vikum.
Það liggur fyrir að mælingar á mjólk í Svínafelli sýna að hún stenst fyllilega samanburð við aðra heilnæma mjólk sem framleidd er á Íslandi. Mengunarmælingar á sorpbrennslunni fóru fram í janúar sl. Umhverfisstofnun mun á næstu vikum taka sýni úr jarðvegi í námunda við sorpbrennslustöðina. Niðurstöður þessara mælinga verða birtar þegar þær liggja fyrir.
